mg 5 ام جي 2021 سعر مواصفات فئات (اهم المميزات و العيوب) جدول أسعار صيانة

mg 5 ام جي لسه لحد دلوقتي فى عيب فى العربية اسمه “اصلها صينى” !! 😏 ، حاجة كده بتتعاير بيها العربية لما يحسوا انها فاقت وبقى ليها وضعها😐 ، فيعنى من باب ماتنساش أصلك ، يا صينى يا مضروب🤨

هل فعلاً العربية اللى معانا النهاردة .. صينى مضروب ومقلب .. وهتشخلل بعد سنه وهيظهر فيها عيوب الدنيا؟🤔

النهارده معانا تقرير الصينية اللى قلبت موازين الفئة الاقتصادية رأسا على عقب

mg 5 ام جي

وبنفكركم هنتكلم فى تقريرنا عن:
🔸 التصميم
🔸 المواصفات الفنية
🔸 الصالون
🔸 الكماليات / الفئات والأسعار
🔸 تجربة القيادة
🔸 الخلاصة

يلا بينا نبدأ ولو حابب تتفرج على الفيديو على قناتنا فى يوتيوب تقدر تشوفه من هنا:

العربية فى فئة السيدان المدمجة
وبينافسها فى السوق
نيسان صنى
شيفروليه اوبترا
رينو لوجان
وممكن فيات تيبو

تصميم mg 5 ام جي

اول حاجة أحب الفت نظر حضراتكم ليها أن العربية شكلها يوحى بأنها صغيرة ومحندقة .. .. دى خدعة ، العربية الخبيثة دى أطول من سيتروين C5 Aircross ، وأعرض من ميتسوبيشى اكليبس ، تصميم جسم العربية انسيابى ومتميز .. وحاسه مستقل ومش مقتبس من أى تصميم تانى ، أكتر حاجة مميزة فى الواجهة خطوط الفوانيس الليد مع الخطوط الكروم الغزيرة .. عامله بصمة جديدة فى شكل العربية وعلامة مميزة فيها

خلفية العربية فيها خط كروم طويل بيربط بين الفوانيس .. اللى بتيجى بتصميم جميل ومميز ، العربية بتتقدم بجنوط حديد مقاس 15 بوصة فى الفئة الأولى وجنوط رياضية مقاس 16 بوصة فى الفئة الثانية والثالثة ، سعة الشنطة … 512 لتر وتعتبر مساحة ممتازة للاستخدام العائلى ، ارتفاع العربية عن الأرض من النقط اللى بتقلق المتابعين للعربية .. وكانت نقطة مثار للجدل .. بالتجربة القصيرة وحمولة 3 ركاب بوزن اجمالى حوالى 300 كيلو .. العربية كانت معقولة جداً فى المطبات العادية .. وباستطلاع اراء الملاك .. فالغالبية بتشوف أن العربية ممكن تحك لو الحمولة أكتر من 3 ركاب مع مطبات الأهالى العشوائية
لكن فى التحميل العادى أو مع المطبات الرسمية فالموضوع أمان ومفيش مشكلة فى الارتفاع عن الأرض.

الموقع الرسمي للشرق الاوسط : https://www.mgmotor.me/ar/

المواصفات الفنية لعربية mg 5 ام جي

العربية مزودة بمحرك تنفس طبيعى سعة 1500 سى سى بقدرة 120 حصان وعزم أقصى للدوران 150 نيوتن عند 4500 لفه
ومتصل بالفتيس صاحب السمعه الرتيبة .. CVT
وزن العربية 1230 كجم ويعتبر وزن خفيف نسبياً
معدل استهلاك الوقود حوالى 6.5 لتر لكل 100 كم
والتسارع من صفر لـ 100 كم بيتم فى حوالى 13 ثانية
طبعاً معدل تسارع قليل نوعاً ما لكن أنا شايفه معقول ومتناسب مع قالب العربية وهنشوف زمن التسارع الفعلى فى تجربة القيادة
نظام التعليق الأمامى هو ماكفيرسون سترت
ونظام التعليق الخلفى هو النظام الاقتصادى تورشين بيم

الصالون mg 5 ام جي

واحنا بنتكلم عن صالون ام جى 5 ، اعملوا حسابكم هنطول شوية .. ليه؟؟
العربية من جوة بتقدم حاجات كتير مفيش منافس فى الفئة السعرية بيقدمها
زى جودة الخامات والتقفيل .. الاتساع وارتفاع السقف .. التناسق والشكل الجميل

يعنى مثلاً فى الفئة الثالثة .. الفرش المتاح فيها ممتاز جداً .. سواء البيج أو الاسود .. وهتقع فى حيرة لو فكرت فى العربية .. كل لون بيقدم ذوق مختلف ..

البيج بيقدم رفاهية غريبة بتاخد العربية فى فئة سعرية أعلى بكتير .. ده غير أنه بيحسسك بوسع الصالون من قبل ماتركب العربية أساساً ..

وإن كان يبدو أنه مش عملى .. بس الصراحة لون يستحق التجربة
أما الاسود .. فهو قصة تانية خالص .. شياكه ورزانه وجو غموض كده .. غير الأبيض خالص .. لكنه برده جميل وبيعكس رفاهية

ملحوظة جوه صالون mg5

أياً كان اختيارك .. فالفرش فى الحالتين جميل ومميز
نيجى بقى للاتساع .. الدرجة كاملة .. العربية مقدمه اتساع جميل فى الصالون .. لو طولك لحد 185 سم مش هتلاقى مشكله وهتقعد فى الصالون مرتاح .. والسقف مش هيضايقك خالص ..
ودى من الحاجات اللى بتعجبنى فى عربيات ام جى .. اتساع الصالون ….. مابتشيلش همه خالص
فى الوقت اللى منافسين كتير مش قادرين يقدموا الاتساع ده
أما بقى الخامات والتقفيل .. مش هاطلع بيها السماء .. بس دائماً عنصر السعر قدامى فى التقييم .. غير كمان المقارنه مع المنافسين فى نفس الفئة
الخامات متوسطة وتقفيلها حلو وماليش تعليق عليه .. ولفت نظرى أن مفيش حاجة ضعيفه أو ممكن تتكسر أو تقشر بسهولة .. من الآخر مفيش استرخاص يعنى.

تصميم التابلوه بسيط جداً وشيك .. فتحات التكييف مرتبطة بشوية كروم متادخل فى التصميم .. ومحلى شكل التابلوه .. جداً
الشاشة متمركزة فى النص مع زاوية ميل بسيطة فى اتجاه كرسى السائق علشان أريحية الوصول والاستخدام … ومن خلالها … تقدر تتحكم فى وظائف كتير زى ضبط التكييف واستخدام الميديا وتوصيل التليفونات .. والمهم هنا أن الشاشة قابله للتوصيل للنظامين iOS و Android بسهولة ودى نقطة إيجابية

ده غير خاصية الكاميرا ٣٦٠ اللى بتسهل السواقة جدآ وبتخليك مسيطر على أبعاد العربية بسهولة
وضعية القيادة ممتازة وبتقدم زاوية رؤية محترمة
طارة جلد بخامة ممتازة فى انتظارك كعادة ام جى ومزوده بأزرار تحكم
الكراسى الأمامية تحكم بالكهرباء .. ودى نقطة ايجابية غريبة .. مش متوقعه فى الفئة السعرية دى

أول حاجة لفتت نظرى فى وضعية القيادة .. العدادات كبيرة بشكل مريح جداً للعين وبيكمل الأريحية شاشة البيانات فى النص .. الحاجة الوحيدة اللى ازعجتنى مؤشر الحرارة ومؤشر البنزين … مساحتهم وشكلهم كان ممكن يبقوا أوضح من كده شوية
وعموماً الاتساع فى الكراسى الأمامية عشرة على عشرة ..

الكنبة الخلفية .. واسعه جداً ومريحه ويا سلام لو كان متاح قدامها فتحات تكييف خلفية … كانت هتاخد العربية فى منطقة تقييم تانيه خالص .. أياً كان .. المساحة ممتازة

الخلاصة .. صالون ام جى 5 بيقدم اتساع ممتاز وخامات حلوة جداً .. ويكاد يكون الصالون المثالى فى الفئة السعرية دى

اهم مميزات mg 5

العربية مزودة بباقة محترمه من عوامل الأمان وكتجهيزات أساسية فى الثلاث فئات .. ودي نقطة تحترم
الفكر الصينى مؤخراً استفاد من سلبيات الفكر الكورى السائد فى الفترة اللى فاتت
لما كان بيقسط عوامل الأمان على الفئات …
لكن هنا الوضع مختلف وعوامل الأمان القياسية متاحه فى كل الفئات وموجودة فى صور البوست
اكثر حاجة شدتنى فى عوامل الثبات فى العربية هو نظام:
XDS
Electronic Differential Lock

وهو نظام فكرته بسيطه جداً .. أنه بيوزع خرج طاقة الموتور على عجلات الجر مش بشكل متساوى فى كل الحالات
يعنى العربية وهى فى حالة طريق منحنى أو ملف بيوزع على العجله البعيدة عن مركز الدوران طاقه أكبر والعكس على العجلة القريبة .. فبيحافظ على ثبات العربية أكثر فى المنحنيات والملفات ودى خاصية موجوده فى عربيات أوروبية زى سيات أرونا وفولكس فاجن جولف مثلاً
للأسف على الرغم من توافر عوامل الأمان الكتيره دى .. العربية مادخلتش حتى الآن فى اختبارات السلامة الأوروبية يورو ان كاب
ولكن حاصلة على خمس نجوم من اختبارات السلامة الصينية

أسعار سيارات 5 mg في مصر

العربية بتتقدم فى السوق المصرى بثلاث فئات الفروق بينهم فى الصور اللى فى البوست
الفئة الأولى: كلاسيك 215.000
الفئة الثانية: كومفورت 235.000
الفئة الثالثة: لاكشرى 250.000

تكييف العربية من النقط المثيرة للجدل فى العربية .. وأول ماتبتدى تفكر فى العربية بشكل جدى لازم تسأل عنه علشان تتطمن ..
التكييف اتقال عليه انه ضعيف وأدائه مش تمام
بالتجربة الفعلية .. التكييف كويس جداً ومش هينفع أقول أنه عيب فى العربية .. تعليقى الوحيد عليه أنه ممكن ياخد وقت ومجهود أكتر شوية لو العربية مركونة فى الحر فترة طويلة .. لكن بمجرد مابياخد وقته .. تبريده ممتاز ومتناسب مع العربية .. ومع تجربة العزل الحرارى للزجاج .. الوضع بيتحسن كتير فى حته الوقت اللى بياخده التكييف للتبريد المثالى
الخلاصة .. تكييف العربية تمام

العربية مزودة بنظام صوتى من 6 سماعات وصوته حلو جداً وبرده لا تعليق عليه

اختبار القيادة في mg5

وضعية القيادة في mg 5 العربية زى ماقولنا بتقدم وضعية قيادة محترمة .. ومع الطارة الجلد والكرسى التحكم بالكهرباء .. مش هتلاقى أفضل من كده

 عزل mg5 تانى هاقولها .. لكل مقام مقال .. عزل العربية مقبول ومتناسب جداً مع سعرها .. العزل كويس وهتحس بهدوء جوة الكابينة .. وكان منطقى يظهر صوت هواء بعد سرعة 120كم

 ثبات mg 5

ثبات العربية بردو كويس جداً .. ويمكن تصميم جسم العربية الانسيابى مع نظام التعليق حقق عوامل إيجابية فى ثبات العربية .. ومعنديش تعليق سلبى أقوله عليه
يمكن شوية النعومة فى العفشة هيحسسوك بميول فى الملفات .. لكن يظل الثبات كويس جداً

الأداء والاستجابة في العربية mg 5

من النقط المثيرة للجدل فى العربية .. أدائها .. وتحديداً .. قوة الموتور والفتيس الـ CVT
خلونا نتكلم واحده واحدة .. وزن العربية 1230 كجم والمحرك قدرته 120 حصان … وانا شايف كعربية سيدان اقتصاديه المعادله مضبوطة .. وقدرة المحرك كويسه جداً وبالتجربة .. هى متناسبه مع جسم العربية ومش هاقول كان يفضل أن القدرة الحصانية تكون أعلى

أما الفتيس فقبل ما اجرب العربية سمعت عن التعليقات حوالين الطلعة وأنها بطيئة .. وفى ناس أضافت أنها بتتأخر .. بدون الدخول فى تفاصيل علمية أو الكلام بمصطلحات وتحليلات .. أنا شايف الفتيس زى الموتور .. عادى وطبيعى ومفيش تأخير فى الطلعه .. هو الفتيس الـ CVT طبيعته وأدائه كده .. ومش عايز أذكر عربيات مماثلة علشان مانقعش فى فخ اسمه انت بتقارن الصينى بالبنهاوى والمستكاوى .. بدون مقارنات .. أداء المحرك والفتيس طبيعى جداً ومتناسب مع فئة العربية وسعرها وحجمها ووزنها .. ها ايه تانى؟
العفشة ظريفة وبتميل للنعومة شويتين … وحبيت النقطة دى جداً فى العربية ..
التوجيه سلس وماحسيتش بمشكله فيه .. وفرامل العربية استجابتها كويسه جداً وسريعة

 الانطباع الشخصى عن السيارة mg

انطباعى الشخصى .. هاقوله بصراحة ووضوح .. مبسوط جداً بالعربية دى كسعر …و امكانيات …
و أداء .. التركيز واضح جداَ فى العربية .. ام جى قررت تقتحم الفئة الاقتصادية بعربية محمله بالمزايا وبسعر تنافسى وضمان مشجع على اتخاذ القرار

الخلاصة عن mg 5

ام جى بتقدم عربية اقتصادية بشكل واسلوب جديد .. اتعودنا فى العربيات الاقتصادية أقل عوامل الأمان ده لو موجوده أصلاً .. كماليات قليلة ورفاهية مفيش .. لكن ام جى كان ليها وجهة نظر تانية … عربية ظريفة بتحقق معادلات كتير بسعر منافس
تصميم عصرى وجميل جواه صالون واسع وخامات جيدة وأداء محرك متناسب مع فئتها ، ومؤمنه بضمان محترم وتنافسى
مشكلتها الأساسية .. أزمة الثقة اللى لسه عند المستهلك المصرى .. الدائم القلق من المنتج الصينى
والأيام وحدها كفيلة بكشف الحقيقة

شكراً ليكم .. ونشوفكم فى تقرير جديد

MG 5 2020 في مصر ، عيوب ام جي 5 2020 ، أسعار صيانة MG 5 ، MG 5 من الداخل ، ألوان MG 5 ، MG 5 2020 ، ام جي 5 2020 فل كامل ، سعر ام جي 5 2020 .